Ngā mahi e whai ake nei
Tīpakonga
Hei te katinga o te tuku tono mai, mā mātou e arotake ngā tono katoa. Ka āta rārangitia ngā kaitono mā te whakaōrite i ngā matatau matua o ngā kaitono, ō rātou tohu, pūkenga, wheako, mōhiotanga me ētahi atu huanga ki ērā ka hiahiatia mō te tūranga. Ka pau pea kotahi wiki, e rua ranei te tukanga āta whakarārangi te whakaoti.
Tēnā pea mā tētahi koe e waea ki te rapu mōhiohio pēnei i tō wātea, i ngā whakaritenga motuhake mō te tūranga (hei tauira, tō ngāwari ki ngā whakaritenga tāpoi), me ētahi atu kōrero tīmatanga.
Mēnā ka āta rārangitia koe, ka waea atu tētahi ki a koe e tono ana kia haere mai kia uiuitia. Ki te kore koe e rongo kōrero mai i a mātou hei te toru wiki ā muri i te rā kati, me whakapā ki te kaiwhakahaere rapu kaimahi.
Ki te kore koe e āta rārangitia, ka wawe tā mātou whakamōhio i a koe mā te īmēra ā muri i te hanganga o taua rārangi
Te uiui
Ko ngā uiui kei Te Kura he uiui whanonga ka aro ki ngā matatau. Ko te uiui whanonga he momo uiui e whakarite ana kia whakaahua koe i tētahi āhuatanga o ō mahi, o tōu ake ora rānei. Ko te tikanga, tīmata ai te pātai whanonga ki ngā kupu: 'Kōrero mai mō tētahi wā i ....', ko tēnei rānei, 'Whakaahuatia mai tētahi āhuatanga kua pā mai ki a koe tētahi raru e pā ana ki ...'.
I tua atu, ka tonoa pea koe ki te hoatu i tētahi whakaaturanga poto mō tētahi kaupapa tauwhāiti. Mēnā me hoatu koe i tētahi whakaaturanga, ka whakamōhiotia koe i mua i te uiuitanga kia reri ai koe.
I ētahi wā, me whakarite he uiuitanga tuarua. I roto i taua wā, ka tūtaki te kaitono i ētahi kaimahi nō te rōpū. Ko te tikanga, he ōpaki ake tērā i te uiui tuatahi.
Ngā whakaōritenga whakawhiwhi mahi
E ū ana a Te Kura ki te whakatairanga me te tautoko i ngā mātāpono o ngā whakaōritenga whakawhiwhi mahi.
Ki te tonoa koe kia haere ki tētahi uiui, kei te pai mēnā ka haere tētahi kaitautoko ā-whānau i tō taha. Kei a koe te tikanga ki te haere mai me tētahi kaitautoko ā-whānau. Mēnā ka pēnā to whakatau, tēnā whakamōhiotia mai i mua i te uiui.
Ngā aromatawai ine i ngā kaha me ngā tukanga hirikapo me ētahi atu momo aromatawai
Mō te nuinga o ō mātou tūranga, me oti pea i a koe tētahi aromatawai ine i ngā kaha me ngā tukanga hirikapo i mua, i muri rānei i te uiui kua whakaritea. Kei roto pea i taua whakamātautau ko tētahi rārangi pātai, ko tōna pūtake he whakamārama mai ki a mātou i te whānuitanga o ō manakohanga me ō kaingākautanga, me te whakamātautau hirikapo, tērā ka ine i tō māia me te kaha i ngā whakaaro ā-kupu, ā-tau, waitara anō hoki.
Tērā tonu pea ka tonoa koe ki te mahi i ngā whakamātautau mahi ki te aromatawai i ō pūkenga me ō kaha whakamahi i te hangarau.
I te tīmatanga o te tukanga tīpako, ka tonoa pea ki te whakarato i ētahi atu momo mōhiohio. Hei tauira, ka tonoa pea kia whakarato i tētahi ataata o tētahi wā ako nāu i whakahaere, tētahi ataata poto o tō tauwhitiwhiti ki ētahi ākonga, tētahi kōpaki rānei o ō mahi.
Ka noho muna ki a koe me ērā i whai wāhi ki te tukanga rapu kaimahi ngā hua o ngā whakamātautau.
Te whakapā ki ērā i whakarato kupu tautoko, me te tirotiro i ngā mahi tōmua
Ngā kaitautoko
Hei wāhi o tō tono, ka tonoa koe e mātou kia whakarato i ngā ingoa me ngā kōrero whakapā mō ō kaitautoko. Ka pātai mātou i a koe, i raro i ō mātou here ki te Ture Matatapu 1993, kia whakaū mai i tō pai ki tā mātou whakapā ki ō kaitautoko.
Te tirohanga o ō mōhiohio e ngā pirihimana
E whakaritea ana ngā kura katoa i raro i te Ture Mātauranga 1989 kia tirohia ō mōhiohio e ngā pirihimana, ahakoa ka whakapā ā-tinana koe ki ngā ākonga, kāore rānei.
E whakarite ana te Vulnerable Children Act 2014 kia oti i Te Kura he 'tirotiro haumaru' ki ngā kaimahi me ngā kaikirimana katoa e mahi ana i te taha o ngā tamariki.
Me tautuku rawa ngā kaitono katoa e angitu ana ki aua whakaritenga mā te whakarato mai i te taunakitanga whaimana o te tuakiri me ngā hua pai o te tirotiro mōhiohio e ngā pirihimana. Mēnā ka hura te pūrongo pirihimana i ngā whiunga kōti e ai ki te kura nei ka whai pānga ki tō kaha ki te mahi i te mahi, ka whakamutua pea te tukanga whakatū kaimahi, ka whakamutua rānei tō whakawhiwhi mahi.
Te tika ki te mahi i Aotearoa.
Kei te otinga pai o ngā whakaritenga katoa tae atu ki ngā taunakitanga o te tika ki te mahi i Aotearoa tētahi tukunga mahi ki a koe. Me whai tika ngā kaitono katoa ki te mahi i Aotearoa i te wā e tukuna ai tā rātou tono.
Te rēhitatanga kaiako
Me whai tūtohi whakaako whaimana ngā kaiako katoa e mahi ana i Te Kura.
Te aromatawai utu ā-tau mō ngā kaiako
Mēnā kāore anō koe kia whakaako i tētahi kura kāwanatanga o Aotearoa i ēnei rā e rua kua hipa, me aromatai tō utu ā-tau Haere ki te paetukutuku Novopay kia kitea he kōrero anō mō tēnei.
Te whakatūnga
Hei te otinga o ngā uiui, o ngā aromatawai, o ngā tirotiro katoa mō mua i te mahi, ka whakapāngia te kaitono angitu. Kātahi ka tukuna he reta tuku i te mahi me tētahi mōkī whakawhiwhi mahi.
Ka whakapāngia ngā kaitono kāore i angitu mā te waea, te īmēra rānei ina oti te whakatau.