Mō Te Kura

http://player.vimeo.com/video/218728142

He kaiwhakarato mātauranga tawhiti a Te Kura e whiwhi pūtea ana i te kāwanatanga e whakarato ana i te whānuitanga o ngā hōtaka ako me ngā akoranga, mai i te kōhungahunga ki te NCEA Taumata 3, ko te nuinga e whakarato tuihonotia ana. Ka āhei ngā ākonga te whakauru mō ētahi whiwhinga i tētahi akoranga, mō tētahi hōtaka wā kikī rānei. E tuwhera ana ki ngā ākonga katoa, mēnā ka tutuki i a rātou ā mātou paearu āheitanga.

Ko Te Kura te kura kāwanatanga nui rawa i Aotearoa, ā, ka whakarato i te whānuitanga o ngā marau me ngā akoranga. He tari ā-rohe ō mātou i Te Whanganui-a-Tara, i Tāmaki Makaurau, i Kirikiriroa me Ōtautahi. E mahi ana hoki ā mātou kaimahi i ngā hapori kei reira he rāpoi o ngā ākonga Te Kura, pēnei i Whāngārei, Heretaunga me Whakatū. Ka āwhina tēnei i ā mātou mahi i ngā hapori ki te tautoko i tō ngā ākonga ako.

Ko tā mātou i Te Kura he tārei atu i tō hōtaka ako kia tau ai ki ō hiahia, me te aha ka whai koe i te ara ako pai ki a koe. E hiahia ana koe ki te ako i hea i tēnei rā: i te kāinga? i tētahi wharekai? Kei a koe te tikanga. E whakatenatena ana mātou i ngā ākonga kia whakahaere rātou i ā rātou anō ako, me te whiriwhiri i ērā e tino hāngai ana ki a rātou. Ka āta mahi tahi ā mātou kaiako ki a koe, ka aromatawai i te āhua o tō koke, ka mutu, ka āta whakaurutau i ō rauemi ako.

He koreutu ki ngā ākonga 19 ngā tau, kei raro iho rānei

He koreutu te whakauru ki Te Kura mēnā ka tutuki i a koe ngā paearu āheitanga a Te Tāhuhu o Te Mātauranga. Ka āhei ngā taiohi 16 ki te 19 ō rātou tau (ā, kāore e eke ki te 20 tau i te tau rēhita) kāore anō kia whakauru ki tētahi atu kura mō te wā kikī, te whakauru koreutu mai ki a mātou. E wātea ana hoki ā mātou akoranga mō te utu iti ki ngā pakeke e 20 neke atu rānei ngā tau.

Ka āhei ngā ākonga e haere ana ki tētahi kura i ngā rā kura te whai i ngā akoranga kāore e wātea ana i tō rātou kura. Me tutuki ētahi paearu āheitanga.

Te marautanga

E whai ana tā mātou hōtaka mātauranga kōhungahunga i te marautanga mātauranga kōhungahunga ā-motu, i Te Whāriki. Ko te pūtake o tā mātau hōtaka Tau 1–13 ko Te Marautanga o Aotearoa. I ngā tau 11–13 e whakarato ana mātou i ngā akoranga rēhita, whaimana, whakamana hoki i te whānuitanga o ngā marau i ngā taumata NCEA katoa.

Te tautoko whakawhaiaro

Ka tautokona koe mā:

Mēnā he ākonga wā kikī, he ākonga mātauranga kōhungahunga koe, he kaitirotiro tōu kua kōharitia ki te aroturuki i tō koke. Ko te tikanga, he matua, he whanaunga rānei tēnā.

Te whakapā ki ngā ākonga me ngā kaiako

Ahakoa he kura ako tawhiti Te Kura, e kore koe e noho mokemoke. Ka whai wāhi koe ki te pāhekoheko ki ētahi atu ākonga i ngā rā takahanga, ngā rā marau me ngā hui tohutohu. Ka tiritiri ariā koe me te whakawhiti i ēnei i waenga i ō kaiako me ō hoa ako mā ngā kōrerorero i Tōku Kura, tā mātou taiao ako tuihono.

Ka auau tā ngā kaiako whakapā ki a koe, taea noatia ngā hui kanohi ki te kanohi ki te hiahiatia.

Te ako pāhekoheko tuihono

E noho tuihono ana te nuinga o ā mātou akoranga, kei roto rānei he rauemi tāpiri tuihono, ina koa i ngā tau 7–13. Kei roto i tēnā, i tēnā akoranga tuihono ētahi kōwae tuihono kei roto ko ngā rauemi ataata-rongo, ngā kai roro me ētahi atu ngohe tuihono hei whakatau i tō māramatanga me te whakapakari i ō ako. Ka whai tautoko koe i ō kaiako me ētahi atu ākonga mā ngā wānanga kōrerorero e āhei ai te tiritiri ariā me te mahi ngātahi. He nui hoki ngā ngohe tuimotu.